ગદ્યકાવ્ય સ્પર્ધાનું પરિણામ
ભાવનગર ગદ્યસભા આયોજિત ગદ્યકાવ્ય સ્પર્ધાનું પરિણામઃ
પ્રથમ વિજેતા કૃતિ- ‘સ્ત્રી’ – રમણીક અગ્રાવત (નર્મદાનગર, ભરૂચ)
દ્વિતીય વિજેતા કૃતિ – ‘કુંડવાવ’ – નટવર હેડાઉ (વાવોલ, ગાંધીનગર)
તૃતીય વિજેતા કૃતિ – ‘મને વિજ્ઞાન પર ભરોસો નથી’ -હરીશ દાસાણી (મુંબઈ)
પ્રોત્સાહન ઈનામ – ‘ચૂંટણીઓ પૂરી થઈ’ -વિરેન પંડ્યા
(નિર્ણાયક શ્રી યજ્ઞેશભાઈ દવે, રાજકોટ)
વિજેતાઓને અભિનન્દન.
અભિવાદન નો કાર્યક્રમ તા-૨૩ જુલાઈ, ૨૦૧૪ બુધવારના રોજ શ્રી બી.એમ.કોમર્સ. હાઈસ્કૂલ સભાખંડ, ઘોઘાસર્કલ, ભાવનગર ખાતે સાંજે ૫-૦૦ કલાકે રાખવામાં આવેલ છે, તો તમામ સ્પર્ધકો અને વિજેતાઓને હાર્દિક આમંત્રણ.
-ભાવનગર ગદ્યસભા.
વહાવી દો (ગઝલ) -સુધીર પટેલ
અમે આંસુ છીએ, ચાહો અગર તો બસ વહાવી દો,
નહીંતર ચૂપ રહેશું જિન્દગીભર જો છુપાવી દો !
હયાતી છે અમારી તણખલા જેવી જ હળવીફૂલ,
તમે માળો સજાવો કે હવામાં એ ઉડાવી દો !
અમે સૂરજ નથી કે જીદ પર આવી સળગશું રોજ,
અમે તો કોડિયાં, ચાહે જલાવો કે બુઝાવી દો !
અમે અંબર નથી કે આંબવામાં પણ પડે ફાંફાં,
અમે ધરતીના છોરું, હાથ દૈ હૈયે લગાવી દો !
અમે વિચાર પણ ક્યાં કોઈ ભારેખમ છીએ ‘સુધીર’?
જરા હળવું કરી કંઇ સ્મિત ચહેરા પર સજાવી દો !
-સુધીર પટેલ
sudhir12@gmail.com
“રાજયોગ” (લઘુકથા) -દિવાકર ઉપાધ્યાય
“રાજયોગ” (લઘુકથા) -દિવાકર ઉપાધ્યાય
શબ્દ સાંભળતા તેના કાન જરૂર ચમક્યા. જીવનમાંકદાચ પહેલીજ વાર આ શબ્દ તેના માટે વપરાયો હતો. પોતાના બાળકોની નાની જરૂરીયાતો પુરી કરવામાં પણ ફાફાં હતા ને ત્યાં વળી આજે મંદિરના પગથીયા ઉપર સામેથી આવતા પંડિતજી એ તેને જોઇને આ શબ્દો ઉચ્ચાર્યા.
થોડે આગળ જતા કોઇ બંગલા માંથી સાદ પડ્યો,
“એ ભાઇ, આ ભંગાર લેશો?”
ભંગાર લેતી વેળાએ તેનું ધ્યાન બંગલાના એક ખુણામાં પડેલી મચ્છરદાની ઉપર ગયું, “આ મચ્છરદાની આપવાની છે?”
દસ રૂપીયામાં ફાટેલી મચ્છરદાની લઇને તે પોતાના ‘ઘર’ સુધી આવ્યો. પતિ- પત્નિએ બે છેડા ફુટ્પાથની દિવાલ ઉપર અને બે છેડા રસ્તા ઉપર ઇંટના ટુકડા ગોઠવીને આજે આ શાહી પથારી બનાવી. તળાવની પાળે વર્ષોથી રહેતા અને વર્ષો જુની મચ્છરદાનીની ઇચ્છા આજે પુરી થઇ હતી. સુતા- સુતા કાનજીના મનમાં આજે સવારે સાંભળેલા શબ્દો પડઘાઇ રહ્યા હતા;
“રાજયોગ”.